सिमकोट । भाद्र शुक्ल तृतीयाका दिनमा मनाइने हरितालिका तीज पर्व आज महादेवको पूजा आराधना गरी हुम्लाका महिलाहरुले मनाईरहेका छन् । आज विहानै देखि सिमकोट तल्लो गाउँ नजिकमा रहेको शिवको मन्दिरमा गएर यहाँका महिलाहरुले पूजाआजा गर्नुका साथै मन्दिरमा नाचगान गरेर रमाईलो गरीरहेका थिए । मन्दिरमा पुजाआजा गरी सिमकोट बजारमा समेत महिलाहरुले एक आपासमा मिलेर नाचगान गरीरहेका थिए । तर लगातारको वर्षाले महिलाहरुको तीजमा नाच्ने रहर भने अधुरै रहने भएको छ ।

आजको दिन व्रत बसी शिव–पार्वतीको पूजा, उपासना गरेमा सुख, शान्ति र परिवारको कल्याण हुने धार्मिक विश्वास छ । शिव–पार्वतीको पूजा गरेपछि नाचगान गर्ने चलन पनि छ । सत्ययुगमा आजैको दिन निराहार व्रत बसी पार्वतीले महादेव स्वामी पाएकोले आजको दिनमा व्रत बस्दा मनोकामना पूरा हुने विश्वास छ । तर, यसको अर्थ सबै नारी निराहार व्रत बस्नुपर्छ भन्ने नरहेको धर्मशास्त्रविद्हरू नै बताउँछन् । दर खाएपछि औपचारिक रुपमा शुरु हुने तीज पर्व ऋषि पञ्चमीसम्म मनाइन्छ ।

तृतीयाका दिन हरितालिका व्रत, चौथीका दिन गणेश भगवानको पूजा र पञ्चमीका दिन स्नान गरी अरुन्धती सहित सप्तऋषिको पूजा गरी तीज समापन हुन्छ । कोरोना भाइरस सङ्क्रमणको जोखिमका कारण अघिल्लो वर्ष तीजमा कुनै भीडभाड थिएन ।

यो वर्ष भने सरकारले सामूहिक भेला हुनबाट रोकेको छैन । पार्टी प्यालेस, खुला ठाउँ र चौरमा भेला भएर महिलाहरूले तीज मनाइरहेका छन् । तर, जनस्वास्थ्यका मापदण्ड पालना गर्न पनि सरकारले आग्रह गरेको छ । तीज पर्वको अवसरमा सरकारले यो वर्ष पनि महिलालाई सार्वजनिक बिदा दिएको छ ।

तस्विर दाने बोहरा