सिमकोट । हुम्लाको खार्पुनाथ गाउँपालिका वडा नम्बर १ को प्युसको एक घरमा आगलागी हुँदा सात लाख रुपैयाँ बराबरको क्षति भएको छ । मङ्गलबार राती प्युस गाउँका सुरज शाहीको घरमा आगलागी भएको हो । घरको चुलामा बालेको आगोबाट राती ११ बजेको समयमा आगलागी भएको जिल्ला प्रहरी कार्यालय हुम्लाले जानकारी दिएको छ ।

आगलागीबाट शाहीको घरमा रहेका सम्पूर्ण सामग्री नष्ट भएको छ । आगलागीबाट गोठमा रहेका पशु, सहित कुखुरा समेत जलेर नष्ट भएको पिडीत शाहीको श्रीमती धनु शाहीले गुनासो पोखिन् । सम्पूर्ण सामग्री जलेर नष्ट हुँदा करिब सात लाख रुपैयाँ बराबरको क्षति भएको मुचुल्का गरेको याङ्चु पैैहरीले बताएको छ ।

आगलागीबाट प्युस गाउँका शाहीको दुई क्विइन्टल अन्नपातमा क्षति पुगेको छ । यस्तै लत्ता कपडा सबै जलेर नष्ट भएका छन् । आगलागीले उनबाट बनेका ३ लिउ, २ फेरुवा, बलाङ्केट, कम्बल समेत जलेर नष्ट भएको छ । यस्तै आठवटा कुखुरा, र छिमेकी जगत परियारले पाल्न राखेका दुई गाई समेत आगलागीमा परेर मरेका छन् ।

आगलागीबाट मानविय क्षति नभएपनि अन्य पशुवस्तु सहित सामाग्रीको क्षति भएको छ । स्थानीयवासीले आगो निभाएको हुन् । हुम्लामा पछिल्लो समय आगलागीका घटना बढ्दै गएको जिल्ला प्रहरी कार्यालय हुम्लाले जानकारी दिएको छ ।