सिमकोट । हुम्लाको चंखेली गाउँपालिका–२ मा भएको पुनः मतदान सम्पन्न भएको छ । गएको शुक्रबार दुईपक्ष विच झडप भएपछि मतदान कार्य स्थगित हुनका साथै आज बुधबार पुनः मतदान भएको हो । आज विहानबाट भएको मतदान कार्य साँझ सम्पन्न भएको हो । बुधबार चंखेली–२ महादेव माध्यामिक विद्यालय दार्मामा रहेको मतदान केन्द्रमा ७८० मत खसेको निर्वाचन कार्यालय हुम्लाका सूचना अधिकारी श्याम बहादुर रानाले बताउनुभयो । महिला ३९५ र पुरुष ३८५ गरेर ७८० मत खसेको हो । पुनः मतदानमा ८६.३७ (प्रतिशत) मत खसेको हो । वडा २ दार्मामा कुल मतदाताको संख्या ९०३ रहेको थियो । आज शान्त वातावरणमा मतदान भएर सम्पन्न भएको जानकारी प्राप्त भएको छ । केही बेरमा सर्वदलिय बैठक बसेर मतगणना कार्य हुने सूचना अधिकारी रानाले बताउनुभयो ।