सिमकोट । नेपाल हेल्थ ट्रष्टले सिमकोटको ठेहे स्वास्थ्य चौकीलाई निःशुल्क प्रदान गरेको साढे दुई लाख बराबर मूल्यको औषधी आज हस्तान्तरण गरिएको छ ।

ठेहे स्वास्थ्य चौंकीमा बाक्लो वस्तीका कारण बिरामीको चाप हुने र त्यस अनुसार औषधीको अभाव हुने भएपछि स्वास्थ्य चौकी इन्चार्ज दानबहादुर बकोहराको अनुरोधमा ट्रष्टले प्रदान गरेको औषधी आज जिल्ला अस्पताल विकास समितिका अध्यक्ष दिपक भण्डारीले हस्तान्तरण गर्नु भएको हो ।

ट्रष्टले खरिद र ढुवानी गरेर पठाएको ४५ थरीको टाटा तथा अन्य औषधी र २७ थरीको इन्जेक्सन भएका ५ कार्टुन औषधी, एक स्टेचर, ट्रलीलगायतका १० पिस स्वास्थ्य सामाग्री आज जिल्ला अस्पताल विकास समितिका अध्यक्ष भण्डारीले ठेहे स्वास्थ्य चौकीका इन्चार्ज बोहरालाई एक कार्यक्रमका बीच हस्तान्तरण गर्नु भएको सिमकोट गाउँपालिकाले जनाएको छ ।

गाउँपालिकाको वडा नम्बर ६ स्थित स्टोरमा भण्डारण गरेर राखिएको औषधी स्वास्थ्य चौकीले पाएपछि बिरामीहरुको उपचारमा ठूलो राहत हुने ठेहे स्वास्थ्य चौकीका इन्चार्ज दानबहदाुर बोहराले जानकारी दिनुभयो ।

स्वास्थ्य सेवा कार्यालय र जिल्ला अस्पतालसँग सहकार्य गरिरहेको नेपाल हेल्थ ट्रष्टसँग आफूले स्वास्थ्य चौकीमा भएको औषधी अभाव भएर बिरामीलाई उपचारमा समस्इा भएको अनुरोध गरेकै आधारमा ट्रष्टले स्वास्थ्य चौकीलाई औषधी उपलब्ध गराएको इन्चार्ज बोहराले बताउनुभयो ।