सिमकोट । हुम्लाको खार्पुनाथ गाउँपालिका–२ थाली गाउँमा रहेको आधारभूत स्वास्थ्य केन्द्र बर्थिङ सेन्टरमा सोमबार ताला लगाइएको छ । वडा नम्बर २ थाली गाउँमा रहेको शंकर माध्यामिक विद्यालय व्यवस्थापन समितिले गाउँमै भएको बर्थिङ सेन्टरमा ताला लगाएको जानकारी प्राप्त भएको छ । विद्यालयको खाली रहेको जग्गामा बर्थिङ सेन्टरको भवन निर्माण गरी स्वास्थ्य सेवा सञ्चालन हुँदै आएपनि रु ६ लाख पचास हजार नपाउँदा सोही विद्यालयका व्यवस्थापन समितिले सोमबार ताला लगाएको बताइएको छ ।

अभिभाव संघका अध्यक्ष संकेश रावलको नेतृत्वमा आधारभूत स्वास्थ्य केन्द्र बर्थिङ सेन्टरमा ताला लगाइएको हो । विद्यालयलाई उक्त रकम दिने भनी कागजी निर्णय गरेर सहमती गरेपनि कार्यान्वय नभएर ठेकेदारले दिनु पर्ने रकम नदिएका कारण ताला लगाएको बताइएको छ । दुई कोठे भएको उक्त बर्थिङ सेन्टरमा सोमबार ताला लगाउँदा सम्पूर्ण स्वास्थ्य सेवा ठप्प भएको छ । विद्यालय व्यवस्थापन समितिले आफुले पाउने पर्ने रकम नपाएको भन्दै ताला लगाएको छ । दुई पक्ष सहमती भएपनि पाउन पर्ने रकम माग गर्दा नदिएपछि ताला लगाइएको हो । सोमबार बर्थिङ सेन्टरमा ताला लगाएपछि स्वास्थ्य सेवा ठप्प भएको बताइएको छ । स्वास्थ्य जस्तो सम्बेदनशिल कार्यालयमा ताला लगाउँदा यहाँका सेवाग्राही मर्कामा परेको बताइएको छ । सोमबार दिनभर थाली गाउँका सेवाग्राही बर्थिङ सेन्टरमा ताला लगाउँदा सेवा पाउनबाट बन्चित भएका छन् ।