सिमकोट । हुम्लाको सर्केगाड गाउँपालिकाका उपाध्यक्ष चन्द्रसिंह कार्की (मुक्ति) को दुर्घटनामा परी निधन भएको छ । सुर्खेतबाट नेपालगञ्ज जाँदै गर्दा फोर्स गाडी दुर्घटना हुँदा उपाध्यक्ष कार्की शख्त घाइते भएका थिए ।

दुर्घटना लगत्तै उपचारका लागि नेपालगञ्ज मेडिकल कलेज भेरी अस्पतालमा लगिएको थियो । उपाध्यक्ष कार्कीको उपचारको क्रममा करिब सोमबार राती दुई बजे निधन भएको अस्पताल स्रोतले जनाएको छ ।

सोमबार सुर्खेतबाट नेपालगञ्ज जाँदै गरेको कर्णाली प्रदेश ०२००१ ख १०११ नम्बरको फोर्स गाडी सुर्खेतको भेरीगंगा नगरपालिका–५ को एमाले मोडमा दुर्घटना हुँदा सवार २४ जना यात्रु घाईते भएका थिए । अन्य घाइतेहरुको सोही अस्पतालमा उपचार भईरहेको जानकारी प्राप्त भएको छ । अन्य घाइतेहरु कोही सामान्य र कोही शख्त घाइते भएको अस्पताल स्रोतले जनाएको छ ।

दुर्घटनामा परी मृत्यु भएका उपाध्यक्ष कार्की नेकपा माओवादी केन्द्रको तर्फबाट हुम्लाको सर्केगाड गाउँपालिकामा गत निर्वाचनमा उपाध्यक्ष निर्वाचत भएका थिए । भने उपाध्यक्ष कार्की कर्णाली प्रदेशसभा सदस्य जुम्कीत लामाका श्रीमान्समेत हुन् ।