सिमकोट । हुम्लाको खार्पुनाथ गाउँपालिका–३ राया गाउँको एक जना बालक चार दिनदेखि बेपत्ता भएका छन् ।

१४ गते दिउँसो ३ बजेटबा साढे दुई वर्षिय बालक सरत रोकाया बेपत्ता भएको वडाध्यक्ष च्यांगा बोहराले बताउनुभयो । बुवा लोकेन्द्र रोकाया र आमा आइती रोकायाका छोरा बालक बेपत्ता भएका हुन् । घरबाटै बालक हराएको बताइएको छ । आमा, बुवा दिउँसो खाजा खान घरभित्र गएको समय बालक घरबाहिर खेल्दै गर्दा हराएको जानकारी प्राप्त भएको छ । राया गाउँबाट कारंगा जाने बाटोमा केही मानिसले बालक रुदैँ जादा देखेपछि घरफिर्ता हुन भनेपनि बालक घर फिर्ता नभएको बताइएको छ ।

बालक हराएको समयदेखि राया गाउँका झण्डै चालीस, पचास जना मिलेर रातभर आसपासका क्षेत्रमा खोजतलास गरेपनि भेटाउन नसकिएको वडाध्यक्ष बोहराले बताउनुभयो । १४ गते रातीदेखि आजसम्म बालकको निरन्तर गाउँ आसपासका क्षेत्रमा खोजी कार्य भएपनि भेटाउन नसकिएको उहाँले बताउनुभयो । बालकको कसैले चोरी गरेको भनौ भने गाउँमा विरानो मान्छे कोही नभित्रीएको बताइएको छ ।

हराएको विषयमा प्रहरी चौकीमा समेत खोजी कार्यका लागि जानकारी गराएको आफन्तले बताएका छन् । यदी कोही कसैले बालक भेटाएमा नजिकैको प्रहरी चौकी र जिल्ला प्रहरी कार्यालय लगायतमा खबर गर्न वडाध्यक्ष बोहराले आग्रह गर्नुभयो । चार दिनसम्म हराएका बालक खोजी गर्दा भेटाउन नसकेपछि पाउने आस मरिसकेको आमा, बुवाले बताउनुभयो ।