सिमकोट । आज पहिलो दिन हुम्लाका पाँच सय पाँच जना बालबालिकाले मोर्डना खोप लगाउन पाएका छन् ।

स्वास्थ्य सेवा कार्यालय हुम्लाले एक दिन ढिला गरी १२ देखि वर्ष १७ उमेरका बालबालिकालाई मोर्डना खोप लगाउने अभियान सुरु गरेको छ । आइतबार मात्रै यहाँका ग्रामिण वस्तिमा रहेका विद्यालयहरुमा अध्ययनरत विद्यार्थीलाई खोप वितरण गरेको थियो ।

हुम्लाको सिमकोट गाउँपालिकामा रहेका तीनवटा विद्यालयका विद्यार्थीलाई मात्रै आज पहिलो दिन खोप लगाएको छ । सिमकोट गाउँपालिका वडा नम्बर सातमा रहेको कैलाश, सदरमुकाम सिमकोटमा रहेका दुईवटा बालमन्दिर र मानसरोवर माध्यामिक विद्यालयका १२ देखि १७ वर्ष उमेर समूहका विद्यार्थीलाई खोप लगाएर अभियानको सुरु भएको स्वास्थ्य सेवा कार्यालय हुम्लाका कोल्ड चेन अशिस्टेण्ड मान बहादुर रोकायाले बताए ।

सदरमुकाम सिमकोटमा रहेका बालमन्दिर र मानसरोवर माध्यामिक विद्यालयका पाँच सय पाँच बालबालिकाले मोर्डना खोप लगाएको सिमकोट गाउँपालिका स्वास्थ्य संयोजक नर बहादुर भण्डारीले जानकारी दिए । आज पहिलो दिन बालमन्दिर माध्यामिक विद्यालयका एक सय ८३ जना र मानसरोवर माध्यामिक विद्यालयका तीन सय २२ जना विद्यार्थीले खोप लगाएको संयोजक भण्डारीले बताए । मानसरोवर माध्यामिक विद्यालयका बालबालिकालाई खोप लगाउने काय सम्पन्न भएको र भोली बाँकी रहेका बालमन्दिर र भिमसेन आधारभूत विद्यालयका साथै बोर्डिङ् तथा निजी विद्यालयका विद्यार्थीलाई मोर्डना खोप लगाइने भएको छ । वडा ७ डाडाफयामा रहेको कैलाश माध्यामिक विद्यालयका विद्यार्थीलाई खोप लगाउने कार्य चलिरहेकाले विवरण एक साथ आउने भएको छ ।

स्वास्थ्य सेवा कार्यालय हुम्लाले मानसरोवर उच्च माध्यामिक विद्यालयका लागि ४०० सय डोज, बालन्दिर माध्यामिक विद्यालयका लागि ३५० डोज, कैलाश माध्यामिक विद्यालयका लागि ३५० डोज, र रामदेब माध्यामिक विद्यालयका लागि १९० डोज खोप सहित आइतबार स्वास्थ्यकर्मी परिचालन गरिएको जानकारी प्राप्त भएको छ । गाउँपालिकाका खोप केन्द्रहरुतर्फ पनि खोप लिएर स्वास्थ्यकर्मी गइसकेकोले खोप केन्द्रमा पुग्ने बित्तिकै सुरु हुने बताइएको छ ।

हुम्लामा ६३७ भाइल खोप आएको छ । यसबाट ६ हजार ३७० बालबालिकाले मात्र भ्याक्सिन लगाउने पाउनेछन् । खार्पुनाथ गाउँपालिकालाई ७२० डोज, ताँजाकोटलाई ८३० डोज र अदानुली गाउँपालिकालाई १०८० डोज उपलब्ध गराइएको छ। जिल्लाका ४४ मध्ये ४१ वडाका खोप केन्द्रमा यो अभियान सञ्चालन हुने भएको स्वास्थ्य कार्यालका असिश्टेण्ड रोकायाले बताए ।

मोडर्ना खोप लगाउनु पर्ने १२ देखि १७ वर्ष उमेर समूहका बालबालिका हुम्लामा ९ हजार ६२१ जना रहेका छन् । हुम्लामा खोप अभियान पुस १४ गतेसम्म सञ्चालन हुने र पहिलो मात्रा खोप लगाएका बालबालिकालाई माघ २ देखि १२ गतेसम्म दोस्रो मात्रा लगाउने भएका छन् ।

हिमपात र चिसोका कारण यसअघि नै जिल्ला खोप समन्वय समितिको बैठकले नाम्खा गाउँपालिकाका वडा नम्बर ४, ५ र ६ मा यस पटक लगाउन नसकिने र पछि उपयुक्त समयमा लगाइने निर्णय गरेको छ ।