सिमकोट । हुम्लाको मध्ये भेगमा रहेको सर्केगाड गाउँपालिका अध्यक्षमा गठबन्धनबाट नेपाली कांग्रेसका ठानबहादुर रोकाया विजयी भएका छन् । विजयी रोकायाले ३ हजार ५४३ मत प्राप्त गरेका हुन् । भने उहाँका प्रतिद्वन्दी नेकपा एमालेका ज्ञामी बुमीले ९९७ मत ल्याउनुभयो ।
उपाध्यक्षमा पनि गठबन्धनका साझा उम्मेदवार चन्द्र सिंह कार्कीले ३ हजार २८२ मत ल्याएर विजयी भएका छन् । उहाँका निकटतम प्रतिस्पर्धी एमालेका जुनकुरा कार्कीले १ हजार ६५ मत ल्याउनु भएको हो ।
एक देखि आठ वडा रहेको सर्केगाड गाउँपालिकाको वडा १ मा बल कार्की, र वडा नम्बर ६ मा पदमबहादुर शाही एमालेबाट विजयी भएका छन् । वडा नम्बर ८ मा रत्नमल रोकाया, २ मा सिद्ध कार्की र ४ मा माधनमल छत्याल नेकपा माओवादीबाट वडाध्यक्षमा निर्वाचित भएका छन् ।
त्यस्तै कांग्रेसबाट वडा नम्बर ७ मा बल खत्री र वडा ५ मा मादलबहादुर सिंह वडाध्यक्षमा निर्वाचित भएका छन् । वडा नम्बर ३ मा भने स्वतन्त्र उम्मेदवार अकिल कार्की निर्वाचित भएका छन् । उहाँ कांग्रेसका बागी हुन् ।