सिमकोट । हिमाली जिल्ला हुम्लामा बिहिबार रातीदेखि हिमपात सुरु भएको छ । हिउँयामको हिमपात हुने मङ्सिर, पुस दुई महिना हिमपात नभएपनि माघ पहिलो सातादेखि जिल्लामा हिउँ थालेको छ । हुम्ला सहित कर्णाली प्रदेशका विभिन्न जिल्लामा बिहिबार रातिदेखि हिमपात सुरू भएको छ ।

उच्च हिमाली जिल्ला हुम्लामा हिमपात हुँदा यहाँको जनजीवन कष्टकर भएको छ । यसअघि गत कात्तिक महिनामा हल्का मात्रै उत्तीर नाम्खामा हिउँ परेको थियो । जिल्लामा बिहिबार रातीदेखि हिमपात हुँदा एक फिटसम्म हिउँ जमेको छ । लामो समयपछि हिउँ पर्दा यहाँका स्थानीय विहानै उठेर फोटो खिच्न थालेका छन् भने सामाजिक सञ्जलामा पोष्ट गर्न सुरु गरेर हिउँमा रमाइरहेका छन् ।
बिहिबार रातिदेखि हिमपात हुँदा उत्तरी नाम्खा गाउँपालिकाको वडा नम्बर ६ लिमीको जनजीवन थप कष्टकर बनेको छ । लिमी, मुचु, खगालगाउँ, तिल, जाङ गाउँलगायत स्थानमा हिमपात हुँदा चिसो बढ्नाका साथै आवतजावतमा समस्या भएको स्थानीयको भनाइ छ ।

सदरमुकाम सिमकोटमा पनि बिहानदेखि हिमपातसँगै चिसो पनि बढेको छ । जिल्लाको तापक्रम माइनमा झरेको छ । माघ पहिलो साता हिमपात हुँदा चैत, बैशाखमा खेतमा छर्किने कोदो, चिनु, फापर लगायतको कात्तिके बाली सपिर्ने आशामा हुम्लाका किसान छन् ।