सिमकोट । हुम्लाको खार्पुनाथ गाउँपालिका वडा नम्बर दुई थाली गाउँमा बुधबार राती लडेर एक युवकको मृत्यु भएको छ ।

वडा नम्बर दुई थाली गाउँका २५ वर्षिय हिर रावलको बुधबार राती लडेर मृत्यु भएको स्थानीय जगत रावलले बताउनुभयो । आफन्तको घरबाट सुत्न गएका रावल रातीको करीब आठ बजे लडेर मृत्यु भएसकेको भएपनि आफुहरुले रातीको १२ बजे मात्रै थाहा पाएको जगतले बताउनुभयो । घरमा परिवारले नआएको जानकारी गराएपछि आफुहरुले खोजतलास गरी रातीको १२ बजे लडेर मृतअवस्थामा भेटाएको जगतको भनाइ छ ।

खर्कबाडामा पहिरो नियन्त्रणका लागि लगाएको ग्याबीनको पर्खालबाट लडेर रावलको मृत्यु भएको हो । गाउँमा लगाईएको पर्खालबाट १० फिट तल खसेका रावल राती अबेरसम्म नआउँदा खोजी कार्य गर्दा पर्खालबाट लडेर मृतक अबस्थामा फेला परेको बताइएको छ । मृतक रावल नेकपा एमाले वडा कमिटीका सक्रिय सदस्य समेत हुन् । उनको आजै हिन्दु धर्मसंस्कार अनुसार अन्त्येष्टि गरिएको जानकारी प्राप्त भएको छ ।