सिमकोट । हुम्लाको सदरमुकाम सिमकोटमा सञ्चालन हुँदै आएका निजी फार्मेसीको सोमबार अनुगमन गरिएको छ । सदरमुकाममा सञ्चालन भएका चारवटा मेडिकलको अनुगमनका क्रममा एक फार्मेसीमा ताला लगाइएको छ । सिमकोटमा सञ्चालित फार्मेसीहरु निर्धारित मापदण्ड बिपरित सञ्चालन हुदै आएको पाइएपछि अनुगमनका क्रमका ताला लगाइएको जानकारी प्राप्त भएको छ ।

निर्धारित न्युनतम मापदण्ड अनुसार पालना नगरी सञ्चालन हुँदै आएको क्रिसव एण्ड क्रिसाङ फार्मेसीलाई ताला लगाएको सिमकोट गाउँपालिका स्वास्थ्य शाखाका प्रमुख नर बहादुर भण्डारीले बताउनुभयो । सदरमुकाममा सञ्चालन हुँदै आएका फार्मेसीहरुको अनुगमन गर्ने क्रममा उक्त फार्मेसीले गाउँपालिकामा दर्ता नै नगरी सेवा प्रवाह गरिरहेको भेटीएपछि ताला लगाएर बन्द गरिएको संयोजक भण्डारीले बताउनुभयो ।

उक्त फार्मेसी अनुगमन गर्दा फार्मेसीका नाममा व्यवसाय दर्ता नभएको, स्थायी पाना नम्बर दर्ता नभएको, मुल्य सुची टाँस नभएको र केही हद म्याद नाघेका औषधीहरु समेत बिक्री गरेको पाइएकोले ताला लगाएको उहाँले बताउनुभयो । उक्त फार्मेसीले आवश्यक सम्पुर्ण मापदण्ड पालना नभएसम्मका लागी ताला लगाउने कार्य जारी नै रहने सहायक प्रमुख जिल्ला अधिकारी अम्रित प्रसाद सुवेदीले बताउनुभयो ।

त्यसैगरी सिमकोटमा सञ्चालन हुँदै आएका अन्य तीन वटा फार्मेसीको अनुगमन गरिएको छ । अनुगमनका क्रममा केही हद म्याद गुज्रेका औषधी समेत भेटिएकोले उक्त औषधीको बरामद गरी टोलीले नष्ट गरेको छ । सिमकोट गाउँपालिकाका उपाध्यक्ष शुशिला रोकाया (भाम)को नेतृत्वमा सदरमुकाममा सञ्चालीत औषधि पसलहरुको अनुगमनमा गरिएको थियो ।