सिमकोट । हुम्लाको सिमकोट गाउँपालिका र सामाजिक विकास कार्यालयले संविधान दिवस अवसरमा जिल्ला अस्पतालका विरामीलाई विहिबार विभिन्न सामग्री सहयोग गरेको छ । आज विहिबार संविधान दिवसको दिन जिल्ला अस्पतालमा उपचाररत रहेका विरामीलाई स्वास्थ्य, सरसफाईका सामग्री सहयोग गरिएको हो ।

अस्पतालमा रहेका उपचाररत प्रति विरामीलाई टावेल, नङकट, मञ्जन बरस, नुहाउने र लुगा धुने साबुनका साथै विरामीलाई आधा किलो हलिक्स समेत सहयोग गरिएको सिमकोट जिल्ला अस्पतालका सिनियर अनमी सरीता बोहराले बताउनुभयो । अस्पतालको इमर्जेन्सी वार्डमा उपचाररत रहेका ११ जना विरामीलाई विभिन्न सामग्री सहयोग गरिएको बताइएको छ ।

सिमकोट गाउँपालिका र सामाजिक विकास कार्यालय हुम्लाको संयुक्त आर्थिक सहयोगमा उक्त सामग्री सहयोग गरिएको हो । प्रति विरामीलाई १ हजार ५ सयका दरले ती सामग्री सहयोग गरिएको हो । भने १६ हजार ५ सय रुपियाँको सामग्री सहयोग गरिएको जानकारी प्राप्त भएको छ ।

संविधान दिवसको असवरमा उक्त सामग्री सहयोग वितरणमा जिल्ला समन्वय समितिका उपप्रमुख दलु फडेरा (सन्जय), सिमकोट गाउँपालिका अध्यक्ष विजय भण्डारी (प्रतिरोध), उपध्यक्ष सुशिला रोकाया (भाम), प्रमुख जिल्ला अधिकारी विनोद कुमार पोखरेल, सामाजिक विकास कार्यालयका प्रमुख हर्क बहादुर बस्नेत, स्वास्थ्य सेवा कार्यालयका प्रमुख प्रेम सिंह लगायतको उपस्थित रहेको थियो । सहयोग सामग्री पाएका उपचाररत विरामीले सहयोगी प्रति धन्वाद समेत दिएका थिए ।